اسكتش لدراسة لم تكتمل

بوست سريع كدا عن ليه الفيديو دا جميل
على ما ربنا يكرم وأبطل كسل وأبقى أكتب عنه دراسة. 🙂
...................
_ اسكتش لدراسة لم تكتمل..
مبدئيا.. الفيديو دا لاقيته في صفحة ما، فمعرفتش أجيب بقيت المسرحية، بس كنت شفت فيديوهات تانية لنفس الموقف، في مسرحيات تانية بأداء تاني، وممثلين تانيين..
دا مشهد متاخد من "أوبرا كارمن" وهى مسرحية لمؤلفها "جورج بيزيه"، الجزء اللي كارمن فيه بتبدأ تعلق القائد "دون خوسيه"، كطبيعتها كفتاة غجرية، مابتؤمنش بالحب، وبتمل من قيوده بسرعة، وبقيت القصة في ويكيبدياعلى جوجل 😀_ هحط لينكها في التعليقات، مع الفيديوهات التانية اللي قايم عليها المقارنة
1/ تناول العرض بشكل مختلف عن العروض السابقة، في إنه بدل ما هو أداء أوبرالي، معتمد على الأغاني مع التمثيل، دا اكتفى بعمل مشهد حركي فقط مع الخلفية الموسيقية، النقطة التانية إن العرض "باليه على التلج 💕 "
2/ الممثلة اللي قايمة بدور كارمن، جسدت فكرة "الأنوثة" و"الغواية" والصراع الداير بين الأبطال، بهدوء شديد جدا، وسلاسة، دون ابتذال.. (زي ما هنشوف في المشاهد الجاية في التعليقات)، قدمت دا بأداء تعبيري بملامحها وحركات جسمها مدروسة جدا، أما البطلات الأخريات (في المشاهد التانية) فكان مصاحب تمثيلهم غناء أوبرالي، فكان الاعتماد في إظهار الأنوثة بشكل خارجي على إظهار مفاتن الجسد، وحركات إيحائية، لكن كارمن هنا أدت دا بأنوثة داخلية (بمشاعر)، ونعومة :) .
3/ اللبس بتاع البطلة مش مبهرج، ودليله على إنها غجرية إختلافه في اللون عن زميلاتها، الأحمر الصارخ، وشراشيب في الجزء السفلي، وبس :)
4/ تسريحة شعرها، ومكياجها، التحدي والقوة بس بهدوء برضه. غير المشاهد التانية.
5/ توزيع الأبطال على المسرح، والأداء، والملاغاة وهى بتلاغيهم، متوازن، وعبّر فعلا على إنها مرغوبة.. وإنها لعوب وجميلة 🙂. وفي الآخر بترمي لخوسيه الوردة كإنها اختارته، فدا بيدي زهو إنه مميز بالنسبة لها. عكس الفيديوهات التانية، الممثلة بتغني وفيه جمود على المسرح مع باقي الممثلين، وعمالة تغني (لامور.. لامور) بتتكلم عن الحب، وإنه مش حقيقي_فيه فيديو ترجمة إنجليزي_ فمدتش قيمة لإنها كارمن الغجرية المشتهاة، بالعكس حسيت إنها متخشبة عالمسرح، أو مبتذلة في مشهد تاني.
...........
معرفتش للأسف أجيب أسماء مخرجين المسرحيات، والأبطال واتعرضت على أي مسرح ، والسنة، بس دا في دراسة جاية، لما أخلص الرسالة بأمر الله 🙂
فيه مسرحية جميلة كاملة، المشهد دا بادئ من الدقيقة 20، الممثلة فيه بتغني، وكانت جميلة برضه في الأداء، هحط لينكه تحت.
ما ننساش "كارمن" المصرية بتاعتنا، الست سيمون وجمالها 💕، المسرحية المصرية أغانيها كلماتها جميلة قوي، هى مترجمة بس محطوطة في السياق حلو، وسيمون كانت قوية وجميلة جدا 💕
سهام محمد_ القاهرة
8/1/2018 

الفيديو
https://www.facebook.com/aralikkapi/videos/750068515139424/?hc_ref=ARSMN8HfgRnFf75CFWuabzOCx_ByIMvzgVNUbS-6TDEm_00mVIHWatHeG5sWKlk1mb8

دي الأوبرا الكاملة، نفس المشهد بادئ في الدقيقة 20، والاداء جميل، والممثلة جميلة 
https://www.youtube.com/watch?v=3h-fP4zSH40

دا المشهد، اللي حسيتها مبتذلة 
https://www.youtube.com/watch?v=KJ_HHRJf0xg

دا المشهد اللي حسيتها متخشبة :)

https://www.youtube.com/watch?v=K2snTkaD64U

الست سيمون ♥ 
https://www.youtube.com/watch?v=ZOdBskU_aKY

ويكيبيديا
https://ar.wikipedia.org/wiki/%D9%83%D8%A7%D8%B1%D9%85%D9%86